[香港] 獅子山上體現行山精神
慈雲山慈雲閣 -> 觀音寺 -> 獅子亭 -> 獅子山尾 -> 獅子山頭 -> 天馬苑
風景：***難度：***
時間：連休息約2.5 小時
路程：約7km
交通：往慈雲山方向的小巴(37M) / 巴士(2F、 3C 、15A)
成長於九龍東，但從來冇上過獅子山。
澳洲working holiday其中一樣最開心的事，就係我愛上了行山 (之後會補返澳洲的遠足分享，講起又諗返起Tasmania 的藍天白雲 :-D )。
返來香港轉眼就兩年，一得閒都會同朋友一起到訪港九新界唔同的行山徑。唔行唔知，原來香港的行山遠足徑真係世界級，市區近近地行兩步就有得行；想要靚景坐車入西貢行又得，山山水水絕不失禮，難怪連《Lonely Planet》都對香港郊野風景推崇備至。
之前在澳洲曾經遇過一位泰國朋友，佢同我講佢話計劃去香港行山，我當時打個突，宜家諗返先知原來自己身在福中不知福。
今次已經係第二次登獅子山頂，上次由獅頭上，獅尾落，今次就相反。
由慈雲山慈雲閣開始上梯級，去到觀音寺回頭一看
 |
| 師主回頭是岸啊! |
行完長樓梯已經一身汗，上到獅子亭有補級，仲有最重要的洗手間，洗個靚面，準備上獅子山！
由麥理浩徑第五段開始行，有冇見過麥理浩？我見過，我真係見過呀！多得佢我地先有咁多行山徑，真係要多謝佢。
行多40分鐘左右已到達獅子山山頭，當天大霧，風景麻麻，唔係好睇得清；獅頭仲要好多飛蚊，短留片刻，就由獅尾落山。
 |
| 獅子山山頂，唔知幾時開始已經成為一個熱點 |
 |
| 山頂遠眺九龍 |
 |
| 沙田一帶景色 |
今次行獅子山，沿途都有好多人，老老嫩嫩、仲有唔少旅客，去旅行加插行山環節的確可以為旅程增添趣味。
細個從未諗過郊野公園都會有消失變為高樓大廈的一日，襯仲有得行，真係要行多D，身體力行話俾政府聽唔好亂搞我地愛惜的郊野公園。
作者：山P遊
熱愛旅行、行山、snapshot、鍾意吹水但會抹咀。畢業後為五斗米折腰其間從未放棄到外國流浪的夢想，工作兩年後在到澳洲Working Holiday一年, 走訪多個主要城市，最後去埋紐西蘭南北島，倦鳥知返。轉眼回港已近兩年，生活回復淡淡似是流水，突然驚覺時光飛逝，實有紀錄一下遊山玩水的經過的需要，好讓他日能好好懷緬，順道與各方好友分享。
留言
張貼留言