[香港] 港島最南端 – 鶴咀

風景：****
難度：**
時間：連休息約3小時
路程：約9km
交通：筲箕灣巴士總站巴士(9號)


機緣巧合睇到歐家麟的潮池: 鶴咀十景‧一次過滿足N個願望，發現原來台灣有國境之南，香港島最南端都有一個從未聽過政府有宣傳的海岸公園，就算天陰都心郁郁忍唔住去睇下被稱為神秘天涯海角鶴咀的盧山真面目。

去鶴咀的方法相當容易，於筲箕灣巴士總站轉乘9號巴士，鶴咀道下車再行入去；如果揸車，我見都有遊人泊在鶴咀道入口，留返位俾人走就可以。當天都與唔少途人一起慢慢步入呢個神秘的地方。

沿鶴咀道走個多小時，途經鶴咀下村就到達了神秘的海岸公園

由於裝備不足，十景之一的機槍廢堡 ，留返下次再去

原本想去爬入去睇不文石，但實在搵唔到入口…唔通入口已經俾石封左？

行左1個多小時，終於到達海岸保護區

鶴咀的英文名Cape D’ Aguilar 同中環老蘭出面的德己立街同一由來，都係源自殖民地時代初期的總司令及副總督D’ Aguilar。

翻查紀錄自1996年劃定鶴咀海岸保護區起，政府都唔鼓勵人來鶴咀，怕破壞環境云云，所以走進半島的路都係路人行出來，廁所亦都唔會有，人有三急只可向草地講聲唔該借借！

政府都唔鼓勵人來鶴咀，走進半島的路都係路人行出來

垃圾灣，如果藍天白雲，呢度應該會好靚

遠眺1875年落成啟用的鶴咀燈塔，天涯海角景色真係可以媲美澳洲、日本的燈塔

雙四門軍事廢墟，二戰時期英軍遺蹟 搖搖欲墜，見到都覺得可惜...

雙四門軍事廢墟伴隨一個蜂去樓空的蜂巢

出得紀念牌就想俾人睇...但政府又唔想人來呢度，好矛盾

香港第一座燈塔建築，2006年獲升格為法定古蹟。燈塔由石塊砌成，高9.7米，唔算話好高大，古典味濃，如果來呢道影結婚相應該都唔錯。

原本以為係細細個去海洋公園睇過的海威小姐，後尾睇返資料先知唔係佢，只係另一條擱淺的大鯨魚

長年經海水侵蝕的蟹洞

一登蟹洞吹吹風！同日都有唔少遊人，男女老幼都有。

又一個海蝕洞，外國通常叫Blow hole，香港就叫雷音洞。

面向南海的鶴咀海岸公園牌面，感覺有D似鳥居。

輕輕鬆鬆遊畢整個鶴咀約2 – 3小時，鶴咀絕對可以係一個適合一家大細親親大自然加學習香港歷史的地方，如果遇上好天，藍天加白雲，坐在青綠的草地上野餐真係一樂也！

鶴咀半島景色怡人，面向無盡頭的南海，望住個燈塔真係有幾秒以為自己返左Melbourne的Cape Schanck；蟹洞上不平的尖石亦好比日本白浜的千疊敷；燈塔、蟹洞再加上二戰軍事廢堡、炮台、天然雷音洞等等，俾著其他國家一定一早做好配套、介紹，將個地方打做成旅遊點。

有時都會諗點解人地國家可以做到自然與旅遊並存，而我地又唔得呢？係政府定係旅客遊人的質素關係？觀乎整天旅程只見一位10多歲的女生在蟹洞上因為大風吹跌手上的紙巾，提一提佢都會執返走，大家都好愛惜呢個海岸保護區。其實教育做得好，就唔會怕環境被破壞！

政府往往都係捉錯用神，以為不停起新景點先會吸引到旅客，其實簡簡單單包裝好我地本身已擁有的歷史、古蹟對旅客來講已經相當吸引　(我去旅行最鍾意睇呢D)；行完龍脊直入鶴咀，睇完玩完再去東大街食碗魚蛋河，完完整整成個Day trip 出左來 (同日都有外國人坐巴士去行龍脊），旅遊業點止購物。

*歐家麟提及的鶴咀十景包括

1. 蟹洞

2. 殺人鯨海威小姐白骨

3. 雷音洞

4. 全港最古老的鶴咀燈塔

5. 蜘蛛天線群

6. 軍事廢墟

7. 垃圾灣

8. 不文石

9. 二戰日軍廢堡

10. 綑邊行澗

是日計埋離遠睇的日軍廢堡都完成了八項，期待下次藍天白雲再探索餘下的兩樣！


*後記，原來宜家經網媒大肆宣傳，鶴咀已成為一個行山熱點，希望大家去到可以愛護返個環境同埋安靜D，唔好影響到個度做研究的朋友啦！

作者：山P遊

熱愛旅行、行山、snapshot、鍾意吹水但會抹咀。畢業後為五斗米折腰其間從未放棄到外國流浪的夢想，工作兩年後在到澳洲Working Holiday一年, 走訪多個主要城市，最後去埋紐西蘭南北島，倦鳥知返。轉眼回港已近兩年，生活回復淡淡似是流水，突然驚覺時光飛逝，實有紀錄一下遊山玩水的經過的需要，好讓他日能好好懷緬，順道與各方好友分享。

Contact email: samptraveldiary@gmail.com
Instagram: https://www.instagram.com/samptraveldiary/